" لطلاب الدراسات العليا بكلية حقوق جامعة القاهرة "
☆ " بوست لمادة البحث "
مقدم من : أكاديمية القائد
▪︎هنوضحلكم فى البوست دا عدة نقاط هامه عن البحث اللى المفروض هنقدمة بإذن الله فى إمتحان الشفوى ؛
▪︎بدايةً البحث اللى هنعملة فى الترم دا يطلق علية
《 بحث تدريبى قصير 》، والهدف منه هو تدريب وتمهيد طالب الدراسات العليا لإعداد بحث الماجستير والدكتوراه ؛ زى ما درسنا الترم الاول فى مادة
"أساسيات البحث العلمى" ،
ويقيم هذا البحث ب ١٠٠ درجة مثل باقى المواد والنجاح فيه من ٦٠ ايضآ ، وقبل البدء فية يجب أولا إختيار دكتور من المذكور بجانبهم فى جدول المحاضرات 《 قاعة بحث 》 وهم :
١_ د. ياسر السرفى
٢_ د. عبدالهادى العوضى
٣_ د. محمد سامى عبدالصادق
٤_ د. قرنى جنيدى ،،،،، *ودا بالنسبة لدبلوم القانون الخاص ، *وللعلم الدكاتره المتاح معهم الان عمل البحث
د. عبدالهادى العوضى
د. قرنى جنيدى ، ودا لان فى دكاتر بتكتفى بعدد معين من الطلبة اللى هتناقش معاهم البحث .
▪︎وبعد ذلك لابد على الطالب ان يعرف أولآ ماهى الموضوعات التى حددها الدكتور فى عمل البحث معه ؛ بمعنى إنى هختار مثلآ أعمل بحث مع د. عبدالهادى العوضى ، وتخصص د. عبدالهادى فى قسم المدنى... ؛ فالموضوع اللى انا هختارة واعمل فيه البحث الافضل يكون فى قسم المدنى او زى ما الدكتور يحدد ، وغالبآ د. عبدالهادى بيطلب من الطلبة إنهم يعملو البحث فى جزء من كتاب مصادر الإلتزام ... ، وهكذا مع كل دكتور..... ؛ يعنى لازم أعرف كل دكتور طالب أعمل البحث فى مادة اية ، وبعد كدا الطالب بيختار موضوع للبحث اللى هيقدمه ويبداء يعمل لية خطة بحث ، وبعد كدا الخطة اللى بعملها دى لازم الدكتور يمضى عليها الاول ، ودا بيبقا قبول من الدكتور إنه موافق على إنك تعمل بحث ف الموضوع اللى اختارتة دا والخطة اللى عملتها تصلح لعمل بحث فيها ، وممكن الدكتور يقولك * لا * الخطة دى محتاج تزود فيها عناصر تانية او تشيل منها حاجه وف الحالة دى بتعدلها وبتعرضها علية مرة أخرى لكى يوافق عليها .
▪︎وبعد ذلك يقوم الطالب بتصوير صورة لخطة البحث اللى الدكتور مضى عليها ويسلمها للشئون ؛ ودا علشان الشئون تسجلك إنك من ضمن الطلبة اللى هتناقش مع د.محمد مثلآ البحث بتاعك يوم الامتحان المحدد لية .
▪︎وبعد كدا الطالب بيبداء فى عمل البحث بناءً على الخطة اللى عملها ، وعدد صفحات البحث يجب الا تزيد عن ١٠٠ صفحة يعنى ممكن يكون فى حدود ٤٠ او ٥٠ او ٦٠ بحد اقصى ١٠٠ صفحة .
▪︎ طيب نيجى بقا للطلبة اللى مش عارفة تعمل الخطة أزاى ؛
طيب إحنا اتفقنا فى البداية إننا هنعمل خطة البحث بناءً على اللى الدكتور محدده فى عمل البحث معاه ؛ نفترض مثلآ إن انا هعمل بحث مقارن بالشريعة الاسلامية وموضوعه الايجار ؛ فا أنا فى الحالة دى لازم اول حاجه اختار عنوان مناسب للموضوع اللى انا هكتب فية ، وليكن اسم الموضوع :
《 الحد الاقصى لمدة الايجار 》دى اول مرحلة
▪︎ المرحلة التانية وهى خطة البحث وكما هو موضح فى الصورة ، دى بالفعل خطة بحث ودا الشكل العام ليها وبتكون بنفس الترتيب بدايةً من الشكل العام للغلاف اللى فيه بياناتى واللى بيحتوى ع شعار الكلية و و و بنفس الشكل الموضح امامكم ، وعشان اسهل عليكم وانا بعمل خطة البحث بعتبر إن عنوان البحث دا سؤال ، وطبيعى اى سؤال بيكون لية عناصر إجابة ؛ عناصر الاجابة دى هى خطة البحث ودى بصورة مبسطة ؛
☆نيجى بقا للكلام العلمى المفروض إنى بعد إختيارى لموضوع البحث ؛ ابداء ابحث فى الكتب اللى كاتبة عن الموضوع اللى هعمل فية البحث دا ابداء اعمل لكل فقرة هكتب فيها عنصر ، والعناصر دى هتكون خطة البحث بتاعتى ، بس خلى بالك ملحوظه هامه انا بحدد فى البداية هل البحث اللى انا هعمله دا هيكون مقارن او بحث وصفى او تاريخى زى ما درسنا فى مادة اساسيات البحث ،
على يد الاستاذ الدكتور ايمن سعد ، وباقى الاستاذة الافاضل ؛ يعنى مثلا انا اختارت إنى هعمله مقارن احدد بقا هل هيكون مقارن مابين القانون الوضعى والقانون الفرنسى او القانون الوضعى والشريعة الاسلامية ، وطبعآ فى الخطة المعروضة امامكم انا محدد من البداية إن الموضوع اللى هكتب فية دا مقارن بالشريعة الاسلامية ؛ يبقا لازم اقسم خطة البحث بتاعتى لجزئين .. جزء بتكلم فية عن الموضوع فى القانون الوضعى المصرى ، والجزء التانى فى الشريعة الاسلامية ، واذكر فيها هى متكلمة عن الموضوع ازاى ، وكما هو موضح لكم فى صورة خطة البحث منقسمة لمبحثين ؛ المبحث الاول عن الحد الاقصى لمدة الايجار فى الفقه الإسلامى ، والمبحث الثانى عن الحد الاقصى لمدة الايجار فى القانون المدنى ،
▪︎ ودا كان بالنسبة لخطة البحث وكيفية كتابتها وازاى نعملها ، وعلى قد ما قدرنا وضحناها بطريقة مبسطة عشان الطلبة اللى مكانتش عارفة تعملها ازاى ، ولو فى اى حاجه مش واضحه معاكم تقدرو تتواصلو معانا وهنوضحهالكم بإذن الله ، والبوست القادم بإذن الله هيكون عن كيفية كتابة البحث نفسه بكل تفاصيلة ، ودا طبعآ عشان البوست ميكونش أكبر من كدا 😃 ، وفى النهاية بنتمنالكم جميعآ النجاح والتوفيق من الله ❤️
■☆ محمد عطا☆■
وللإستفسار واتساب التواصل على الارقام التالية :
01092323866 & 01271424879 & 01117596163
■☆ أكاديمية القائد ☆■
تعليقات
إرسال تعليق