▪︎ميعادنا النهاردة مع الجزء الأخير من القانون التجاري ✨
▪︎عمليات البنوك😉👇🏻مقدم من : ▪︎أكاديمية القائد
هو يعني ايه عمليات بنوك ؟طيب يعني ايه بنك ؟ ايه هي أنواع العمليات اللي هيقوم بيها البنك؟! 🤔 ايه هي الودائع النقدية او المصرفية ؟ يعني ايه قرض مصرفي ؟يعني إيه اعتماد وايه انواعه؟ايه هو الحساب الجاري ؟🤔👈🏻كل ذلك وأكثر مع أكاديمية القائد😂♥️
تعالي نشوف ايه حكايه عمليات البنوك😉👇🏻
▪︎عمليات البنوك
دي مجموعة أعمال بيقوم بيها البنوك زي مثلا قبول ودائع مصرفية وفتح اعتماد وتسهيل عمليات مصرفية وأي عملية وارده علي الأوراق والسندات والبضائع😉
▪︎طيب هو يعني ايه بنك اصلا🤔👇🏻
البنك دا مؤسسه لقبول الودائع ولمنح القروض وفتح الحسابات التجاريه وقبول الأوامر الماليه.
انا عارفه انك بتقول ايه الكلام الكبير دا انا مش فاهم دا الموضوع صعب اجري يامجدي🏃🏻♂️😂 استني بس هبسطهالك😅👇🏻
البنوك دي زي تاجر كبير بس تاجر في الأموال😉بالظبط القلب اللي بيضخ أموال للمعاملات المالية والبنك بقا علشان يجذب عملاء ليه علشان يعملوا ودائع أو يقترضوا منه بيفضل يعمل عروض مغريه وجذابة علشان يضمن تعاقد عملاء كتير معاه 😉
من العمليات اللي بيقوم بيها البنوك زي ماقولنا فوق (قبول ودائع ،فتح حسابات جارية ، تقديم قروض مصرفية ،وفتح اعتمادات )تعالي نشوف 👇🏻
▪︎الودائع النقديه😉👇🏻
اي حد فينا لو معاه مبلغ مالي كبير او عنده مجوهرات بيكون خايف عليها من السرقه او الضياع وبيبقي محتاج يحفظها في مكان آمن 😉البنوك بتقوم بالحفظ دا عن طريق الودائع النقدية ازاي ؟!🤔
البنوك قدمت للعملاء أكتر من اختيار هنشوفهم دلوقتي😉
▪︎طيب يعني ايه وديعة الأول قبل مانشوف انواعها👇🏻
هي عقد يتملك بسببه البنك مبلغ مالي أودعه العميل عنده والبنك بيلتزم بموجب العقد دا إنه يرد المبلغ وفقا لشروط العقد.
▪︎انواعها✨👇🏻
1/❄️ودائع تحت الطلب 👇🏻
ودي بتقدر فيها تودع المبالغ ووقت ماتحتاجها تسحبها والبنك ميقدرش يستثمر الأموال دي بس في الودائع دي مش هتاخد فوائد عليها😉 وليك حق تاخد دفتر شيكات وكمان فيزا
2/❄️الوديعة بشرط الاخطار السابق👈🏻يعني العميل يبلغ البنك قبل مايسحب الوديعة بمده معينه.
3/❄️ الودائع لأجل 👈🏻 يعني العميل هيودع المبلغ في البنك لكن هيستني فترة معينه مش هيسحب منها حاجه وبعدها يتقاضي فوائد عنها و بزيادة المده تزيد قيمه الفائدة ، الوديعه دي لا يجوز السحب منها الا بعد مرور المدة المحددة لو حصل دا هيكون ب إجراءات صعبه وبدفع مبالغ مالية لأن العميل كدا هيبقى ▪︎كسر الوديعه😉
4/❄️الودائع الحرة والمقيدة👇🏻
ودي لو خصص العميل الوديعه لغرض معين هنا مينفعش يسحب منها ل أي غرض تاني.
5/❄️الودائع الإدخاريه👇🏻
ودي الهدف منها الادخار والحصول علي فوائد
✋🏻 ▪︎استني 🤚🏻
قبل الإيداع لازم البنك يفتح للعميل حساب بيكون تحت تصرفه والحساب هنا مش مطلوب لذاته ولكن مطلوب علشان العمليات المصرفية اللي هتتم
✨ ▪︎مجموعة ملاحظات خلي بالك منها ✨😉👇🏻
1/الحساب دا فيه جانب دائن وجانب مدين
2/الحساب دا بيفترض استمرار العلاقة بين البنك والعميل 😉
3/العميل ممكن يفتح أكتر من حساب وكل حساب بيكون مستقل عن التاني ما لم يتم الإتفاق علي غير ذلك .
4/ممكن مجموعه عملاء يشتركوا في حساب واحد بس وقتها مش هينفع عميل لواحده يقوم بعملية سحب الا بموافقه باقي العملاء ،لكن يجوز لكل عميل الإيداع في الحساب بمفرده ،ولو حصل مشكله مالية بين العملاء بيتم إخطار البنك علشان يجمد الحساب ويقولهم اما تحلوا مشاكلكم قولولي علشان ارجع الحساب😅
5/حسابات العملاء بيانتها سريه ؛ لا يجوز للغير الاطلاع عليها إلا بإذن من العميل او وكيله او الورثه او حكم من المحكمه او بواسطة النائب العام او المحامي العام الأول بعد طلب من محكمة استئناف القاهره بسبب جناية أو جنحه😁
6/الحساب بيتقفل لإنتهاء مدته في العقد او وفاة العميل او إفلاسه أو الحجز عليه ، ولكن الوديعة لا تقفل بعد وفاة العميل ؛ الا اذا طلب الورثه 😉
7/العميل دائما في الوديعة دائن والبنك مدين .
8/ البنك مش بيتشدد مع العميل في الودائع يعني مش بيتحري عنه لأن العميل بيقدم اموال😉لكن لو بياخد أموال زي قرض او فتح حساب جاري او اعتماد مستندي هيقوله لا استني اتحري عنك الأول🤷🏻♀️
9/ ▪︎مهمه جدا
الوديعه هي عقد قرض.
ـــــــــــــــــــــــــــــــــــــــــــــــــــ
بعد كدا هنشوف *الحساب الجاري* 👇🏻
دا حساب بيقرر للعميل الحق في عمل مجموعه عمليات مصرفية متعددة وفي النهاية بيكون في عملية تصفية واحده عند قفل الحساب 😉
الحساب الجاري ممكن يكون بين عميل وبنك او بين اتنين عملاء .
العميل ليه حق الحصول علي دفتر شيكات وفيزا للتعامل بها.
▪︎ملحوظه مهمه😉👇🏻
1/أثناء سريان الحساب الجاري لا ترتب فوائد لكن نقدر نرتب فوائد لو عملنا قطع دوري للحساب كل فترة معينه علشان نحسب الفوائد ،وكمان ممكن نقرر الفوائد بعد قفل الحساب.
2/ كل العمليات اللي بيقوم بيها العميل بتندمج وتصبح عملية واحده وبكدا مينفعش نطالب بكل دين ناتج عن كل عملية علي حدا لأن الدين بيصبح في النهاية دين واحد وبيتم تصفيته من خلال مقاصه نهائيه.
3/العميل يقدر يقوم بتغذيه الحساب بالمدفوعات عشان يفضل هو الدائن دايما للبنك😉
4/ممكن في النهاية العميل هو اللي يطلع مدين للبنك لأن الحساب الجاري عملية إئتمان علشان كدا مش هنقدر نعرف الدائن من المدين الا بعد قفل الحساب😉
▪︎القرض المصرفي👇🏻
إتفاق من خلاله بيلتزم البنك بتقديم مبلغ للعميل اللي بيلتزم برده خلال فترة معينه القرض دا ممكن يبقي مخصص لغرض معين وفي الحالة دي البنك بيراقب العميل في تصرفاته وكمان العميل مش بيقدر يتصرف في القرض في غير الغرض المخصص ليه😉وممكن يكون القرض غير مخصص لغرض ؛ فالبنك مش هيبقي ليه حق مراقبة العميل🤷🏻♀️
▪︎الاعتماد المصرفي👇🏻
بينقسم ل إعتماد عادي وإعتماد مستندي :
الاعتماد العادي : دا عقد بيلتزم البنك بسببه ب إنه يوفر للعميل مبلغ مالي خلال فترة معينه علشان يدفعه لجهه معينه
❄️الاعتماد المستندي👇🏻
تعهد من البنك بناء علي طلب المشتري لصالح البائع والبنك بيلتزم فيه بالوفاء بالمبلغ المحدد في مده محدده لو البائع قدم ليه المستندات الخاصة بالبضائع المطابقه للشروط.
▪︎بالبلدي 😂👇🏻
عندنا مستورد عايز يستورد بضائع معينه من مصنع معين بمواصفات معينه ،والمستورد خلاص اتفق مع المصنع علي السعر لكن المصنع مش عايز يبعت البضائع إلا لو المستورد دفع الثمن علشان خايف ينصب عليه😂 والمستورد مش عايز يدفع إلا لما المصنع يبعت البضائع علشان خايف يتنصب عليه😂 طيب ايه حل المشكلة دي؟🤦🏻♀️👇🏻
المشتري( اللي هو المستورد)هيطلب من البنك يدفع المبلغ للمصنع (يضمنه يعني)لو المصنع بعت البضائع بالمواصفات المطلوبه، ودا ممكن يحصل بين البنك والعميل او بين بنكين (بنك البائع وبنك المشتري)😉واتحلت خلاص واتحلت معاها مشكله عمليات البنوك 🤷🏻♀️😂
دمتم سالمين♥️🌸
وبكدا يبقا متبقى مادتين هنقدملكم ليهم مدخل بسيط وسهل ايضآ اللى هما ( التشريعات ، و الجنائي ) ، وبعد كدا هنبداء فى سكاشن المراجعه بإذن الله ، ونشوفكم ع خير بإذن الله واى حد عنده اى سؤال واقف معاه يتواصل معانا واتساب على الارقام التالية :
01092323866 & 01117596163 & 01271424879 ❤️
💥 #أكاديمية_القائد_حقوق_القاهرة
تعليقات
إرسال تعليق